Posts

Showing posts from June, 2020

बाहिर अनि भित्र

Image
   ~~बाहिर अनि भित्र~~ नाङ्गो छ आकाश उदाङ्गो छ जून तर कति सुन्दर ! एसियन हाईवेको दोबाटोमा केही दिन अघि मात्र उभेको छ ताड़को रूख जस्तो  भीषण अग्लो एक प्रकाश-स्तम्भ त्यसैबाट जोगिदै जोगिदै  सर्लक्क नाघेर आएको छ - एक केस्रा जून अनि विस्तारै खसेको छ मेरो साँघुरो सहरिया आँगनमा | आकाशको बीचबाट बग्दैछ आकाशगङ्गा त्यो पनि देखिन्छ धमिलो  सहरको एलईडी प्रकाशलेे प्रदुषित भएर  तरै पनि....तरै पनि .... जब जानेछु अनन्त यात्रामा एक दिन महाकाशको बाटो भएर एक क्षण रोकिनेछु त्यहाँ  अनि पखाल्ने छु मैलो सबै  त्यहीं !.... आकाशगङ्गामा ! किन कि मलाई थाहा छ - मेरा छुद्र पापहरू पनि पखाल्न सक्तैन धरतीको दुषित गङ्गाले ! तरै पनि.....तरै पनि  कुनै एक दिन गएर  एउटा दीप बगाउँने छु त्यहाँ पनि |                   १८/०९/२०

हाईकु

Image
                  हाईकु   नयन भरी बसिदिन्छ जमेर  मिरिक झील.       *****   शिशिर याम चपाउँदै छ ठिही भुटेको मकै      *****   नलाउ माया दुई दिन त हो नि जाड़ोको घाम.                                      *****  

सहर (पुरानो फेसबुक पोस्ट)

Image
सहर :  दृश्य - १ सहरको एउटा ठूलो होर्डिङ्गमाथि पखेटा खसालेर बसेकोछ एउटा बुढ़ो काग अनि ,  हेर्दैछ मुन्टो बटारेर  दाहिने आँखाले उँधोतिर     विज्ञापनकी सुन्दरी मोडेललाई |   --------------------------------------- सहर :  दृश्य - २  सहरबिच पुलको फुटपाथमा  गोड़ा पसारेर बसेकी छिन् एउटी अर्धविक्षिप्त आमा निर्विकार दृष्टीले हेर्दैछिन् विकारग्रस्त सहरको धमिलो आकाशलाई अनि - चुसाउँदैछिन आफ्नो छाती भोकाएको नाङ्गो-भुतुङ्गो दुधमुखे बालकलाई | ----------------------------------------- सहर : दृश्य - ३ सहरको व्यस्त बजारको एउटा गल्लीमा आफ्ना ठुटा हात खुट्टा देखाउँदै लड़ी-बुड़ी गरेर भिक्षा माँग्दै छ एउटा हृष्ट-पुष्ट देखिने कुष्टरोगी छेउ लागेर हिड़दै छन् कति आफ्नै खुशीमा हाँस्दै ईत्रिदै अनि कति  आफ्नै दुःखमा पिरोलिएका अन्यमनष्क अनुहारहरू !  ------------------------------ सहर : दृश्य - ४     सहरको मूलबाटोमा    एउटा साँढ़ेले हान्दैछ   पार्क गरेर राखिएका  महँङ्गा कार अनि बाईकहरूलाई  सहरमा जन्मेर सहरमै विचरण गर्ने...

शिर्षक विहीन

Image
शिर्षक विहीन  पहाड़, हरियाली र ससाना थुम्काथुम्की हरेक थुम्कामा हरियो चियाबारी अनि चियाबारीमाथि नीलो आकाशमा उड़ी रहेका वेरङ्ग सपनाका बादलहरू | यी सबलाई वास्तै नगरी पिठ्यूँमा टोकरी बोकेर चियाका मुनाहरू होईन जीवनका दुःखाईहरू टिपिरहेका  केही चेलीहरू | यो दृश्य देखी रहन्छु  बेला बखत सपनीमा पनि |   त्यसैले, पहाड़ छोड़े पछि विस्मृत नहोस भनेर बनाउँन लाएकोछु चित्रकार भाईलाई  ठूलो एउटा क्यानभासमा त्यस्तै दृश्य अँटाएको एउटा चित्र अनि भनेकोछु -  तिम्रो कल्पनामा आए पनि नआए पनि बनाई देउ है चित्रको पृष्टभूमिमा- एउटा ढुस्स परेको अग्लो कञ्चनजंघा | चियाबारीको सुन्दर दृश्यमा  कतै कतै ब्रसले हा'न्दिनु है-  चियाबारीको बेदनाका दुई चार हल्का स्ट्रोकहरू | जुन चित्रलाई बनाउँन सकूँ पहाड़को चिनो सजाउँन सकूँ पछि मेरो सहरीया घरको बैठक कोठामा अनि चिया पिउँदै पिच्छे हरेक दिन अनुभूत गर्न सकूँ            चियाबारीको सुन्दरतापछिको विडम्बनाहरू |                        रचना काल - ११/१०/२०१८

बैंसका चित्रहरू

Image
~बैंसका चित्रहरू~ सुनसान देखिने यस बाटोबाट केही क्षण अघि मात्र भित्रिएकाछन पार्कमा  धेरै .....जोड़ी-जोडी बैंसालु पाईलाहरू मनको खल्तीमा बोकेकाछन् सप्तरङ्गगी सपनाका रङ्गहरू अनि बैंसका विविध कुचीहरू | बसेका छन पोथ्रा-पोथ्रीको आड़ लिएर आफ्ना एकान्त निजी क्षणहरू रोजेर कोर्दैछन् मीठा तर बाङ्गा-टेड़ा  भोलीका रेखाहरू भर्दैछन  रङ्गहरू... यौवनको सादा क्यान्भासमा | कसलाई थाहा कतिको चित्र  जाला च्यातिएर, अर्थहीन रेखाहरू र बेमेल रङ्गहरूले कुनै आकार लिन नपाई | कतिको चित्र जीवन्त भई  भरिएला जीवन खुशीले  अनि केही वर्ष पछि  तिनै जोड़ी जोड़ी पाईलाहरू यसै बाटोबाट गर्लान भित्र प्रवेश एक जोड़ी बालक पाईलाहरू डोऱ्याऊँदै | (पुरानो फेसबुक पोस्टबाट)