सहर (पुरानो फेसबुक पोस्ट)

सहर : दृश्य - १
सहरको एउटा ठूलो होर्डिङ्गमाथि
पखेटा खसालेर बसेकोछ
एउटा बुढ़ो काग
अनि ,
हेर्दैछ मुन्टो बटारेर
दाहिने आँखाले उँधोतिर
विज्ञापनकी सुन्दरी मोडेललाई |
---------------------------------------
सहर : दृश्य - २
सहरबिच पुलको फुटपाथमा
गोड़ा पसारेर बसेकी छिन्
एउटी अर्धविक्षिप्त आमा
निर्विकार दृष्टीले हेर्दैछिन्
विकारग्रस्त सहरको धमिलो आकाशलाई
अनि -
चुसाउँदैछिन आफ्नो छाती
भोकाएको
नाङ्गो-भुतुङ्गो दुधमुखे बालकलाई |
-----------------------------------------
सहर : दृश्य - ३
सहरको व्यस्त बजारको एउटा गल्लीमा
आफ्ना ठुटा हात खुट्टा देखाउँदै
लड़ी-बुड़ी गरेर भिक्षा माँग्दै छ
एउटा हृष्ट-पुष्ट देखिने कुष्टरोगी
छेउ लागेर हिड़दै छन् कति
आफ्नै खुशीमा हाँस्दै ईत्रिदै
अनि कति
आफ्नै दुःखमा पिरोलिएका
अन्यमनष्क अनुहारहरू !
------------------------------
सहर : दृश्य - ४
सहरको मूलबाटोमा
एउटा साँढ़ेले हान्दैछ
पार्क गरेर राखिएका
महँङ्गा कार अनि बाईकहरूलाई
सहरमा जन्मेर सहरमै विचरण गर्ने ऊ
शायद तिनलाई नै आफ्नो प्रतिद्वन्द्वी ठान्दैछ
अलिक पर उभिएर सिभिक पुलिस
मरी-मरी हाँस्दै छ |
--------------------------------------
सहर : दृश्य - ५
सहरमा हरेक रात चल्छ
अँध्यारो र उज्यालोको तुमुल द्वन्द्व
शून्य र कोलाहलको माझमा
शान्ति खोज्छ मनले-
स्मार्टफोनको टचस्क्रीनमा
जुनकिरी निर्वासित भएको यो सहरमा
देखिदैन राति तिनीहरूको समूह-नृत्य
तर
लामखुट्टेहरूले बाहिर गाउँछन्
डेङ्गुको स्वागत-गीत
**************
Comments
Post a Comment